સાંસ્કૃતિક કાર્યક્રમો સાથે પૌષ્ટિક ભોજન વાનગીઓની ઝાંખી કરાવવામાં આવી, વિવિધ કીટ અને સન્માનપત્રનું વિતરણ
સમી તાલુકાના ગોધાણા ગામે આંગણવાડી કેન્દ્ર ખાતે ‘આંગણ ઉત્સવ’ કાર્યક્રમ યોજાયો
પાટણ જિલ્લાના સમી તાલુકાના ગોધાણા ગામે આંગણવાડી કેન્દ્ર ખાતે ‘આંગણ ઉત્સવ’ કાર્યક્રમની ઉત્સાહભેર ઉજવણી કરવામાં આવી હતી. આંગણવાડી કેન્દ્રના બાળકો, મહિલાઓ તથા ગ્રામજનોની ઉપસ્થિતિ વચ્ચે યોજાયેલા આ કાર્યક્રમમાં બાળ વિકાસ, પોષણ, આરોગ્ય અને વિવિધ સર્જનાત્મક પ્રવૃત્તિઓને પ્રોત્સાહન આપતી કામગીરી કરવામાં આવી હતી.
કાર્યક્રમમાં ગોધાણા આરોગ્ય કેન્દ્રના CHO પાયલબેન પટેલ, ગામના સરપંચ હસાબેન નાડોદા, નિલેશભાઈ નાડોદા તેમજ યુવા મહિલા મોરચાના હેતલબેન જાદવ સહિતના આગેવાનો અને મહાનુભાવો ઉપસ્થિત રહ્યા હતા. મહાનુભાવોના હસ્તે કાર્યક્રમની વિવિધ પ્રવૃત્તિઓનું નિરીક્ષણ કરવામાં આવ્યું હતું અને બાળકો તથા મહિલાઓને પ્રોત્સાહિત કરવામાં આવ્યા હતા.
‘આંગણ ઉત્સવ’ દરમિયાન આંગણવાડીના બાળકો દ્વારા વિવિધ સાંસ્કૃતિક કાર્યક્રમો રજૂ કરવામાં આવ્યા હતા. બાળકોની વિવિધ કૃતિઓથી ઉપસ્થિતોમાં આનંદનો માહોલ જોવા મળ્યો હતો. બાળકોમાં રહેલી પ્રતિભાને પ્રોત્સાહન મળે અને તેમનો સર્વાંગી વિકાસ થાય તે હેતુથી આવા કાર્યક્રમોનું આયોજન કરવામાં આવે છે.
આ પ્રસંગે પોષણ અને આરોગ્યને લગતી વિવિધ બાબતો અંગે પણ જાગૃતિ ફેલાવવામાં આવી હતી. વિવિધ પૌષ્ટિક ભોજન વાનગીઓના નમૂનાઓની ઝાંખી કરાવવામાં આવી હતી. બાળકો, સગર્ભા અને ધાત્રી માતાઓ તેમજ પરિવારના સભ્યો માટે પૌષ્ટિક આહાર કેટલો મહત્વનો છે તે અંગે પણ માહિતી આપવામાં આવી હતી. સ્થાનિક સ્તરે ઉપલબ્ધ વિવિધ પૌષ્ટિક સામગ્રીનો યોગ્ય ઉપયોગ કરીને સંતુલિત આહાર તૈયાર કરી શકાય તે અંગે વાનગીઓ દ્વારા સમજ આપવામાં આવી હતી.
કાર્યક્રમ દરમિયાન વિવિધ પ્રકારની કીટનું વિતરણ કરવામાં આવ્યું હતું. લાભાર્થીઓને જરૂરી સામગ્રી આપવામાં આવી હતી. સાથે જ કાર્યક્રમમાં કામગીરી કરનાર તથા વિવિધ પ્રવૃત્તિઓમાં સહભાગી રહેલા વ્યક્તિઓને પ્રોત્સાહિત કરવા સન્માનપત્ર અર્પણ કરવામાં આવ્યા હતા.
આંગણવાડી કેન્દ્ર માત્ર બાળકોની સંભાળ પૂરતું મર્યાદિત ન રહે પરંતુ બાળ વિકાસ, પૂર્વ પ્રાથમિક શિક્ષણ, પોષણ અને માતા-બાળ આરોગ્ય અંગે ગ્રામ્ય વિસ્તારમાં જાગૃતિનું મહત્વનું માધ્યમ બને તે દિશામાં આવા કાર્યક્રમો મહત્વપૂર્ણ સાબિત થઈ રહ્યા છે. ‘આંગણ ઉત્સવ’ના માધ્યમથી બાળકોને પોતાની પ્રતિભા રજૂ કરવાની તક મળવાની સાથે વાલીઓ અને ગ્રામજનોમાં પણ પોષણ અને આરોગ્ય અંગે જાગૃતિ વધે તેવો પ્રયાસ કરવામાં આવ્યો હતો.
સમગ્ર કાર્યક્રમ દરમિયાન ઉપસ્થિત મહાનુભાવો, આંગણવાડી સાથે સંકળાયેલા કાર્યકરો, બાળકો, મહિલાઓ અને ગ્રામજનોમાં ઉત્સાહ જોવા મળ્યો હતો. ગોધાણા ગામે યોજાયેલ આંગણ ઉત્સવમાં સાંસ્કૃતિક કાર્યક્રમો, પૌષ્ટિક ભોજનની ઝાંખી, કીટ વિતરણ અને સન્માનપત્ર અર્પણ સહિતની વિવિધ પ્રવૃત્તિઓ સાથે કાર્યક્રમને ઉજવણીસભર બનાવવામાં આવ્યો હતો.
The Gujarat Live News ગોવાભાઈ આહીર પાટણ