વાઈબ્રન્ટ ગુજરાત રિજનલ કોન્ફરન્સ : વાઈબ્રન્ટ કચ્છ ડિસ્ટ્રીક્ટ લેવલ પ્રોગ્રામ

વાઈબ્રન્ટ કચ્છ જિલ્લાકક્ષાના પ્રોગ્રામનો વન અને પર્યાવરણ મંત્રીશ્રી અર્જુનભાઈ મોઢવાડીયાના વરદહસ્તે ગાંધીધામ ખાતે ભવ્ય શુભારંભ

વાઈબ્રન્ટ કચ્છ પ્રોગ્રામમાં કુલ 334 MSME એકમો સાથે રૂ.8500 કરોડના MoU સાઈન થયા

ઉચ્ચ શિક્ષણ અને તાંત્રિક શિક્ષણ રાજ્યમંત્રીશ્રી ત્રિકમભાઇ છાંગાની ગરિમામય ઉપસ્થિતિ

વન અને પર્યાવરણ મંત્રીશ્રી અર્જુન મોઢવાડીયા :

વાઈબ્રન્ટ ગુજરાત-વાઇબ્રન્ટ કચ્છ જિલ્લાકક્ષાનો કાર્યક્રમ સાહસિકોને નવી ઉર્જા પ્રદાન કરશે

વડાપ્રધાનશ્રીના વિઝનના લીધે વિકાસનું કેન્દ્ર બનેલું કચ્છ દેશના લાખો લોકોને રોજગારી આપી રહ્યું છે

રીન્યુએબલ એનર્જી, ગ્રીન હાઇડ્રોજન તથા બ્લુ ઇકોનોમીના ક્ષેત્રોમાં વૈશ્વિક હબ બનવાની કચ્છમાં વિપૂલ સંભાવના

કચ્છીમાડુઓના ખમીર અને સરકારના વિઝન થકી કચ્છ ઔદ્યોગિક હબ બન્યું છે

રાજ્યમંત્રીશ્રી ત્રિકમભાઇ છાંગા

હસ્તકલા આધારિત રોજગારી ધરાવતું કચ્છ આજે ગુજરાતમાં ઔદ્યોગિક વિકાસનું કેન્દ્ર

આજરોજ કચ્છના ગાંધીધામ ખાતે વન-પર્યાવરણ મંત્રીશ્રી અર્જુન મોઢવાડીયાએ વાઈબ્રન્ટ કચ્છ ડિસ્ટ્રીક્ટ લેવલ પ્રોગ્રામનો પ્રારંભ કરાવ્યો હતો. વાઈબ્રન્ટ કચ્છ કાર્યક્રમમાં કુલ ૩૩૪ MSME એકમો સાથે રૂ.૮૫૦૦ના કરોડના MoU સાઈન થયા હતા.

ડૉ. બાબાસાહેબ આંબેડકર કન્વેશન સેન્ટર ગાંધીધામ ખાતે વાઇબ્રન્ટ કચ્છ કાર્યક્રમનો શુભારંભ કરાવતા વન-પર્યાવરણ મંત્રીશ્રી અર્જુન મોઢવાડીયાએ જણાવ્યું હતું કે, કચ્છની ખમીરવંતી પ્રજાએ અનેક કુદરતી આફતોની પીડા વેઠીને આજે કચ્છને વિકાસનું કેન્દ્ર બનાવ્યું છે. સરકારના વિઝન અને કચ્છીઓની ખુમારી થકી કચ્છ ઔદ્યોગિક હબ બન્યું છે. વડાપ્રધાનશ્રી નરેન્દ્રભાઇ મોદીની દૂરંદેશિતાથી એક પ્રદેશની કઇ રીતે કાયાકલ્પ થઇ શકે તેનું કચ્છ ઉદાહરણ છે. કચ્છીઓ જે રીતે પડકારોને ઝીલનારી પ્રજા છે તે જ રીતે વડાપ્રધાનશ્રીએ કચ્છના પડકારોને તકમાં પલાટાવીને કચ્છનો અભૂતપૂર્વ વિકાસ કર્યો છે. પાણી, રોજગાર સહિતના મુદે એક સમયે પીડિત કચ્છ આજે અન્ય રાજ્યોના લોકોને રોજગારી આપી રહ્યું છે. વડાપ્રધાનશ્રી નરેન્દ્રભાઇ મોદીના વિઝન હેઠળ મુખ્યમંત્રીશ્રી ભૂપેન્દ્રભાઈ પટેલની સરકાર વિકાસના રથને આગળ વધારતા કચ્છ આજે ટુરીઝમ, ખેતી તથા ઔદ્યોગિક વિકાસમાં અગ્રેસર બન્યું છે. કચ્છ રીન્યુએબલ એનર્જીનું હબ સાથે દેશનો ૪૦ ટકા કાર્ગો હેન્ડલ કરી રહ્યું છે. મંત્રીશ્રીએ આવનારા સમયમાં કચ્છ ઇલેકટ્રોનિક કમ્પોનન્ટના પીસીબીના નિમાર્ણ માટે, ગ્રીન હાઇડ્રોજન, ડેટા સેન્ટર, બ્લુ ઇકોનોમી જેવા ક્ષેત્રના વિકાસ માટે મુખ્ય કેન્દ્ર બની શકે તેમ હોય રોકાણકારોને તેમાં જોડાવવા હાકલ કરી હતી.

આ તકે ધોલેરાના વિકાસ વાત કરતા તેઓએ ઉમેર્યું હતું કે, પડકારોને તકમાં પરિવર્તન કરવું વડાપ્રધાનશ્રીના વિઝનમાં છે. કોરાનાકાળમાં ગણતરીના દિવસોમાં વેક્સિન બનાવવાથી લઇને લોકોને આપવા સુધીની કામગીરી કરી ભારતે અન્ય દેશોને માત આપી હતી. આજે ભારત વેક્સિન હબ બન્યું છે. તે જ રીતે સેમિકન્ડટર, ઇલેકટ્રોનિક કમ્પોન્ટના પડકારને ઝીલીને તેના ઉત્પાદન માટે સજ્જ બનેલું ભારત આવનારા વર્ષોમાં આત્મનિર્ભર બની દુનિયામાં અગ્રેસર બનશે.

વન અને પર્યાવરણમંત્રીએ વધુમાં જણાવ્યું હતું કે, વિકસિત ભારતના સપનાને સાકાર કરવા માટે દરેક ક્ષેત્રે દેશને આત્મનિર્ભર બનવું પડશે. આ માટે કચ્છમાં ભરપૂર પોટેન્શિયલ હોવાથી ભારતના ભવિષ્યને નિમાર્ણ કરનાર ક્ષેત્રમાં રોકાણ માટે કચ્છમાં આવી સંપત્તિસર્જન કરવા આહવાન કર્યું હતું. આવનારો સમય એઆઇ, ક્વોન્ટમ ટેકનોલોજી તથા બાયો ટેક્નોલોજીનો હોવાથી આ ક્ષેત્રમાં વિકાસ માટે આધુનિક રિસર્ચ સેન્ટર, એક્સલન્સ લેબનું સહિતનું નિર્માણ કરી ગુજરાત સજ્જ બન્યું હોવાનું જણાવતા તેમણે ઉમેર્યું હતું કે, કચ્છનો ગોલ્ડન પિરિયડ ચાલી રહ્યો છે. તેઓએ “ટકાઉ વિકાસ”ની વિભાવના અને પર્યાવરણની જાળવણીના સંકલ્પ સાથે કચ્છમાં વલ્ર્ડ ક્લાસ નર્સરી બનાવવા જણાવ્યું હતું. કચ્છમાં ગ્રીન કવર વધારવાની આ ઝુંબેશમાં ઉદ્યોગો પણ જોડાય તેવો અનુરોધ તેમણે કર્યો હતો.

ઉચ્ચ શિક્ષણ અને તાંત્રિક શિક્ષણ રાજ્યમંત્રીશ્રી ત્રિકમભાઈ છાંગાએ પ્રાસંગિક ઉદ્બોધન કરતાં જણાવ્યું હતું કે, વડાપ્રધાનશ્રી નરેન્દ્રભાઈ મોદીએ મુખ્યમંત્રી તરીકે ધુરા સંભાળી ત્યારથી વાઇબ્રન્ટ ગુજરાતની શરૂઆત થઈ હતી. આજે જિલ્લાકક્ષાએ તેનું આયોજન કરવામાં આવી રહ્યું છે. જે બદલ તેમણે કચ્છ જિલ્લા વહીવટી તંત્ર અને કચ્છના ઉદ્યોગ સાહસિકોને અભિનંદન પાઠવ્યા હતાં.

વડાપ્રધાનશ્રી નરેન્દ્રભાઇ મોદીએ વિકાસને આંદોલન બનાવીને ભૂકંપની પીડા સાથે પાણી, બેરોજગારીની સ્થિતિમાં કચ્છને બેઠું કર્યું છે. મુખ્યમંત્રીશ્રી ભૂપેન્દ્રભાઈ પટેલના માર્ગદર્શનથી કચ્છ અવિરત વિકાસ સાધી રહ્યું છે. માળખાગત સુવિધાઓ વધી, ઔદ્યોગિક વિકાસ, ટેકનોલોજી સાથે બંદરોનો વિકાસ થતાં કચ્છમાં રિવર્સ માઇગ્રેશન થઈ રહ્યું છે તેવું રાજ્યમંત્રીશ્રીએ ઉમેર્યું હતું.

હસ્તકલાના કચ્છી કારીગર શ્રી પાબીબેનને યાદ કરતાં રાજ્યમંત્રીશ્રીએ જણાવ્યું હતું કે, એક સમયે હસ્તકલા અને ગૃહ ઉદ્યોગ આધારિત રોજગારી ધરાવતું કચ્છ હાલ ગુજરાતમાં ઉદ્યોગોનું હબ બનવા જઈ રહ્યું છે. વાઇબ્રન્ટ થકી કચ્છમાં કરોડોના રોકાણો થઈ રહ્યાં અને રોજગારીની તકો ઉભી થઈ છે તેમ રાજ્યમંત્રીશ્રીએ ઉમેર્યું હતું. આર્થિક વિકાસ સાથે જ નૈતિક મૂલ્યો જાળવી રાખીને સાથોસાથ સામાજિક વિકાસને ધ્યાને રાખીને દેશના વિકાસમાં સહભાગી બનવા નાગરિકો અને ઉદ્યોગોપતિઓને રાજ્યમંત્રીશ્રીએ અનુરોધ કર્યો હતો.

આ પ્રસંગે કરછ મોરબી સાંસદશ્રી વિનોદભાઈ ચાવડાએ જણાવ્યું હતું કે, વડાપ્રધાનશ્રીના દીર્ઘ વિઝનથી વાઇબ્રન્ટ ગુજરાતની શરૂઆત થઈ હતી. જેનો લાભ કચ્છને મળતાં પોર્ટ, મિનરલ્સ, કેમિકલ સહિતના ક્ષેત્રે હજારો ઔદ્યોગિક યુનિટ્સ ધમધમી રહ્યા છે. આજે કચ્છમાં રોજગારીની વિપૂલ તકોનું સર્જન થઈ થતાં અન્ય રોજ્યોના લોકો અહીં રોજગારી માટે આવ્યા છે. જેને કચ્છીઓ માટે ગૌરવની વાત ગણાવી સાંસદશ્રીએ ઉમેર્યું હતું કે, કચ્છ ગુજરાતનો એક માત્ર જિલ્લો છે કે જેને રણ, દરિયો અને ડુંગરનો ત્રિવેણી સંગમ મળ્યો છે. મુખ્યમંત્રીશ્રીના અવિરત પ્રયાસોના કારણે આજે કચ્છ કૃષિ, ઉદ્યોગ અને ટુરિઝમનો ક્ષેત્રમાં અગ્રેસર બન્યું છે. વડાપ્રધાનશ્રીના મેક ઇન ઇન્ડિયા, લોકલ ફોર વોકલના વિઝનને સાર્થક કરીને યુવા સાહસિકો, રોકાણકારોને વાઇબ્રન્ટ પ્રોગ્રામમાં જોડાવા સાંસદશ્રીએ અપીલ કરી હતી.

દીનદયાળ પોર્ટના ચેરમેન શ્રી એસ.કે.સીંગે જણાવ્યું હતું કે, વિકસિત ભારતના વિઝનમાં ગુજરાત રાજ્ય તથા તેમાં કચ્છ જિલ્લો ખાસ પ્રદાન કરશે. કચ્છના ભૌગોલિક સ્થાન થકી તમામ પ્રકારની કનેક્ટિવિટી ઉપલબ્ધ હોવાથી રોકાણકારો કચ્છના વિકાસના ભાગ બનવા ઉત્સુક છે. વિકસિત ભારતના વિઝનમાં કચ્છમાં પોર્ટ- મેરીટાઇમ સેક્ટરનું પ્રદાન નોંધનીય બનશે. તેમણે ઉમેર્યું હતું કે, કંડલા પોર્ટ ગ્રીન હાઇડ્રોજન તથા શીપ બિલ્ડીંગ ક્ષેત્રે લીડ કરી રહ્યું છે. ભવિષ્યમાં આ બંને ક્ષેત્રોનો વિકાસ થશે ત્યારે તેમણે રોકાણકારોને કચ્છમાં ગ્રીન હાઇડ્રોજન પાર્કમાં જોડાવવા આહવાન કર્યું હતું.

આ પ્રસંગે કચ્છ કલેક્ટરશ્રી આનંદ પટેલે જણાવ્યું હતું કે, વિકસિત ભારતના સપનું સાકાર કરવાની પહેલમાં બીજ સ્વરૂપે વવાયેલું વાઈબ્રન્ટ ગુજરાત આજે વટવૃક્ષ બન્યું છે. જિલ્લાકક્ષાના વાઈબ્રન્ટ કાર્યક્રમના આયોજનથી સાથે રિજનલ વાઈબ્રન્ટ કોન્ફરન્સના આયોજનથી ઔદ્યૌગિક વિકાસને નવી દિશા મળશે. તેમણે વડાપ્રધાનશ્રીના વિઝનથી એક સમયનું કચ્છ આજે લેન્ડ ઓફ ઓપ્ચ્યુરનિટી બન્યું છે તેમ જણાવ્યું હતું.

ગાંધીધામ ચેમ્બર્સના પ્રમુખશ્રી મહેશભાઈ પુંજ એ પ્રાસંગિક પ્રવચન કરતાં જણાવ્યું હતું કે, વડાપ્રધાનશ્રીના વિકાસના વિઝનથી કચ્છ રીન્યુએબલ એનર્જી, ગ્રીન હાઈડ્રોજન, પોર્ટ્સ, કેમિકલ એન્ડ મિનરલ્સ તથા ટુરીઝમ સહિતના અગત્યના સેક્ટરમાં અગ્રેસર બની રહ્યું છે. વિકાસ સાથે કચ્છમાં મળેલી અગત્યની તકો બદલ મુખ્યમંત્રીશ્રીનો આભાર માન્યો હતો.

આ સાથે જ ડી પી વર્લ્ડના ડાયરેક્ટર શ્રી પરાગ કોચરે બ્લૂ ઇકોનોમીના મહત્વ વિશે જણાવ્યું હતું અને કચ્છમાં પોર્ટના વિકાસની અપાર તકો છે તેમ ઉમેરી ભારત-માર્ટ વિશે માહિતી આપી હતી.

કીરી ઇન્ડસ્ટ્રીઝના મનીષ કીરીએ જણાવ્યુ હતું કે, કચ્છ ગુજરાતનું આર્થિક પાવર હાઉસ બની રહ્યું છે. ગ્રીન હાઈડ્રોજન, ડિજિટલ સ્ટ્રક્ચર, સી વોટર ,એગ્રીકલ્ચર, એડવાન્સ મરીન કેમિકલ મિનરલ્સ ઇન્ડસ્ટ્રીના વિકાસથી કચ્છની જમીન રોકાણકારો માટે”ઇન્ડસ્ટ્રીયલ લેન્ડ” બનીને ઊભરી આવી છે.

કચ્છ મેનેજમેન્ટ એસોસિએશનના પ્રમુખશ્રી તેજાભાઈ કાનગડ એ કાર્યક્રમના અંતે આભારવિધિ કરી હતી.

વાઈબ્રન્ટ કચ્છ ડિસ્ટ્રીક્ટ પ્રોગ્રામમાં ગાંધીધામ ચેમ્બર્સ ઓફ કોમર્સ ઈવેન્ટ પાર્ટનર તરીકે જ્યારે દીનદયાળ પોર્ટ ટ્રસ્ટ વેન્યૂ પાર્ટનર તરીકે જોડાયા હતા. આ ઉપરાંત ફોકિયા અને કચ્છ મેનેજમેન્ટ એસોસિએશન એ નોલેજ પાર્ટનર તરીકે સહભાગી બન્યા હતા.

આ પ્રસંગે જિલ્લા પંચાયત પ્રમુખશ્રી જનકસિંહ જાડેજા, ધારાસભ્ય સર્વશ્રી કેશુભાઇ પટેલ, માલતીબેન મહેશ્વરી, શ્રી પ્રદ્યુમ્નસિંહ જાડેજા, શ્રી અનિરુદ્ધભાઈ દવે, પૂર્વ વિધાનસભા અધ્યક્ષશ્રી ડો.નીમાબેન આચાર્ય, અગ્રણી શ્રી દેવજીભાઈ વરચંદ, શ્રી ધવલભાઈ આચાર્ય, પૂર્વ કચ્છ એસ.પી શ્રી સાગર બાગમાર, ગાંધીધામ કમિશનરશ્રી મનીષ ગુરવાની, જીઆરઆઇટીના જોઇન્ટ સીઇઓશ્રી સ્તુતિ ચારણ, એઆરએમશ્રી આશીષ ધાનીયા, ઈન્ડસ્ટ્રીઝના જોઈન્ટ કમિશનરશ્રી કનક ડેર સહિત મોટી સંખ્યામાં ઉદ્યોગકારો અને વિદ્યાર્થીઓ ઉપસ્થિત રહ્યા હતા.

The Gujarat Live News અહેવાલ ધનજીભાઈ ચાવડા ભચાઉ કચ્છ