કરોડોના કામો છતાં રસ્તા, ગટર અને સુવિધાઓની હાલત યથાવત રહેતા નગરજનોમાં અસંતોષ, ટેન્ડર પ્રક્રિયાની સંપૂર્ણ વિગતો જાહેર કરવાની માંગ ઉઠી
રાધનપુર શહેરમાં વિકાસના નામે થતા કરોડો રૂપિયાના વિવિધ કામો અને તાજેતરમાં ખુલેલી ટેન્ડર પ્રક્રિયાને લઈને નગરમાં ભારે ચર્ચા અને સવાલોનો માહોલ સર્જાયો છે. શહેરમાં વર્ષોથી રોડ-રસ્તા, ગટરલાઈન, પાણી નિકાલ, સ્ટ્રીટલાઈટ અને અન્ય પાયાની સુવિધાઓ માટે સરકાર દ્વારા કરોડો રૂપિયાની ગ્રાન્ટ ફાળવાતી હોવાના દાવાઓ વચ્ચે સામાન્ય નાગરિકોમાં હવે વિકાસના ખર્ચ, ગુણવત્તા અને પારદર્શિતાને લઈને ગંભીર પ્રશ્નો ઊભા થવા લાગ્યા છે.
ચોમાસાની ઋતુ નજીક આવી રહી છે ત્યારે શહેરના અનેક વિસ્તારોમાં રસ્તાઓ પર ખાડાઓ, વરસાદી પાણી ભરાવાની સમસ્યા, ગટર ઉભરાવા તેમજ અપૂર્ણ કામોને લઈને લોકોમાં ભારે અસંતોષ જોવા મળી રહ્યો છે. નગરજનોમાં ચર્ચા ચાલી રહી છે કે જો દર વર્ષે વિકાસ માટે કરોડો રૂપિયાનો ખર્ચ કરવામાં આવે છે તો શહેરની વાસ્તવિક પરિસ્થિતિમાં નોંધપાત્ર સુધારો શા માટે જોવા મળતો નથી.
તાજેતરમાં ખુલેલા ટેન્ડરોને લઈને સ્થાનિક સ્તરે અનેક પ્રકારની ચર્ચાઓએ જોર પકડ્યું છે. શહેરમાં એવી પણ ચર્ચાઓ ચાલી રહી છે કે કેટલાક કામોમાં ઓછા દરવાળા ટેન્ડર કરતાં વધુ ખર્ચાળ ટેન્ડરને પ્રાથમિકતા આપવામાં આવી હોવાના આક્ષેપો થઈ રહ્યા છે. જોકે, આ ચર્ચાઓ અને આક્ષેપોને લઈને હજુ સુધી કોઈ સત્તાવાર પુષ્ટિ સામે આવી નથી. તેમ છતાં શહેરમાં લોકો વચ્ચે સવાલો અને શંકાઓ સતત વધી રહી છે.
સ્થાનિક નાગરિકોનું સ્પષ્ટ કહેવું છે કે સરકાર અને નગરપાલિકાના નાણાં અંતે જનતાના ટેક્સના પૈસા છે. તેથી દરેક વિકાસ કાર્યમાં ખર્ચ, મંજૂરી અને ટેન્ડર પ્રક્રિયા સંપૂર્ણ પારદર્શક હોવી જોઈએ. લોકો સવાલ ઉઠાવી રહ્યા છે કે જો ઓછા ખર્ચે કામ શક્ય હતું તો વધુ ખર્ચ શા માટે કરવામાં આવ્યો? કયા માપદંડોના આધારે ટેન્ડરોને મંજૂરી આપવામાં આવી? ટેક્નિકલ કારણોસર કોઈ નિર્ણય લેવાયો હોય તો તેની ખુલ્લેઆમ જાહેર સ્પષ્ટતા શા માટે કરવામાં આવતી નથી?
આ સમગ્ર મામલે જવાબદાર અધિકારીઓ અને પદાધિકારીઓનો સંપર્ક કરવાનો પ્રયાસ કરવામાં આવ્યો હોવાની માહિતી સામે આવી રહી છે, પરંતુ સ્પષ્ટ જવાબ હજુ સુધી સામે આવ્યો નથી એવી ચર્ચા છે. કેટલાક અધિકારીઓ ટેક્નિકલ પ્રક્રિયાનો ઉલ્લેખ કરી રહ્યા હોવાનું કહેવાય છે, જ્યારે કેટલાક દ્વારા નિર્ણય પ્રક્રિયા અંગે મર્યાદિત માહિતી હોવાની વાતો પણ સામે આવી રહી છે. પરિણામે શહેરમાં અસંતોષ અને ચર્ચાઓ વધુ તેજ બની રહી છે.
નગરના જાગૃત નાગરિકો હવે ખુલ્લેઆમ માંગ કરી રહ્યા છે કે ટેન્ડર પ્રક્રિયાની સંપૂર્ણ વિગતો જાહેર કરવામાં આવે. કયા ટેન્ડર આવ્યા, કેટલા દર રજૂ થયા, કયા ટેન્ડર રદ કરવામાં આવ્યા, કયા મંજૂર થયા અને તેના પાછળના કારણો શું હતા તેની સ્પષ્ટ માહિતી જાહેર કરવામાં આવે જેથી જનતા સામે હકીકત સ્પષ્ટ થઈ શકે.
સ્થાનિક લોકોનું માનવું છે કે જો તમામ કામગીરી નિયમો અને કાયદાકીય પ્રક્રિયા મુજબ કરવામાં આવી હોય તો જવાબદાર તંત્રએ આગળ આવી ખુલાસો કરવો જોઈએ. બીજી તરફ, જો કોઈ ગેરરીતિ અથવા અનિયમિતતાના આક્ષેપોમાં સત્યતા હોય તો તેની નિષ્પક્ષ, પારદર્શક અને ઉચ્ચસ્તરીય તપાસ થવી જરૂરી છે.
રાધનપુર શહેરમાં હવે માત્ર વિકાસના દાવાઓ નહીં પરંતુ વિકાસના ખર્ચ, કામોની ગુણવત્તા અને નિર્ણય પ્રક્રિયાની પારદર્શિતાને લઈને પણ લોકો વધુ જાગૃત બનતા જોવા મળી રહ્યા છે. નગરજનોનો સ્પષ્ટ સંદેશ છે કે વિકાસ માત્ર કાગળો અને જાહેરાતોમાં નહીં પરંતુ જમીન પર દેખાવા જોઈએ આ ભ્રસ્ટાચાર બાબતે રાધનપુરની જાહેરપ્રજાને ટેન્ડર પ્રકિયામાં જો ભ્રસ્ટાચાર ના હોઈ તો નગરસેવક જયાબેન ઠાકોરે લાઈવ ડિબેટમાં હિસાબો પણ જનતા સમક્ષ મુકવા જાહેરાત કરી હતી છતાં સત્તાપક્ષ ઉંદરની જેમ દરમાં સંતાઈ ગયા હતા અને જનતાના નાણાંનો હિસાબ આપવા ના આવ્યા તમામએ જનતા અને વિપક્ષની માંગ છે કે જનતા સામે સ્પષ્ટ અને જવાબદારીપૂર્વક હિસાબો રજૂ થવા જોઈએ.
The Gujarat Live News ગોવાભાઈ આહીર પાટણ