રાધનપુર શહેરમાં માનવજીવન માટે જોખમી સાબિત થતી તંત્રની બેદરકારીનો જીવંત દાખલો ગઈકાલે જોવા મળ્યો.
સરસ્વતી નગર સોસાયટીની રહેવાસી નર્મદાબેન પ્રજાપતિ (વયઃ અંદાજે 55 વર્ષ)નું ખુલ્લી ગટરમાં પડી જવાથી કરૂણ અવસાન થતા સમગ્ર વિસ્તારમાં શોક તથા રોષનું મોજું ફેલાઈ ગયું છે
ઘટના કેવી રીતે બની?
માહિતી મુજબ, નર્મદાબેન ગઈકાલે સાંજે લગભગ સાત વાગ્યે પોતાના ઘરની બહાર સોસાયટીના મુખ્ય માર્ગ પરથી પસાર થઈ રહ્યા હતા.
અંધારાનો માહોલ હોવાને કારણે ખુલ્લી ગટર તેમને દેખાઈ નહોતી.
અચાનક તેઓ તેમાં પડી જતા માથામાં ગંભીર ઈજા થઈ અને તાત્કાલિક હેમરેજ થવાથી પરિસ્થિતિ ગંભીર બની ગઈ.
આસપાસના લોકોએ તેમને તરત જ નજીકની હોસ્પિટલ ખસેડ્યા, પરંતુ ડોક્ટરો તમામ પ્રયત્નો કરવા છતાં તેમનું જીવન બચાવી શક્યા નહોતાં.
લાંબા સમયથી રજૂઆતો છતાં તંત્ર બેદરકાર
રાધનપુર શહેરમાં ખાસ કરીને સરસ્વતી નગર વિસ્તાર તથા નેશનલ હાઇવે નજીક ખુલ્લી ગટરો મુદ્દે વારંવાર રજૂઆતો થતા આવ્યા છે.
નગરસેવક જયાબેન ઠાકોર તેમજ અનેક રહીશોએ નગરપાલિકા અને સંબંધિત તંત્રને આ બાબતે અનેક વખત લેખિત તથા મૌખિક રજૂઆતો કરી હતી.
પરંતુ આ રજૂઆતોને ગંભીરતાથી લીધા વગર વર્ષોથી ગટરો ખુલ્લી જ રહેતા રહીશો માટે મોતના કૂવામાં ફેરવાઈ ગઈ છે.
જો તંત્ર સમયસર પગલાં લેતું તો આજે આ દુર્ઘટના બની ન હોત.
નગરસેવકનો આક્ષેપ – “જવાબદારો વિરુદ્ધ ફોજદારી કાર્યવાહી થાય”
દુર્ઘટના બાદ નગરસેવક જયાબેન ઠાકોરે પીડિત પરિવારને મળીને સાંત્વના પાઠવી હતી.
તેમણે જણાવ્યું કે, “આ માત્ર એક અકસ્માત નથી, પરંતુ તંત્રની ઉદાસીનતાથી સર્જાયેલ જાનહાનિ છે.
જવાબદાર અધિકારીઓ વિરુદ્ધ ફોજદારી કાર્યવાહી થવી જોઈએ અને ભવિષ્યમાં આવી ઘટના ફરી ન બને તે માટે તાત્કાલિક તમામ ખુલ્લી ગટરોને ઢાંકી દેવા જોઈએ.”
રહીશોનો રોષ – “સામાન્ય લોકોના જીવનો કોઈ કિંમત નથી?”
સોસાયટીના રહીશોમાં ભારે રોષ વ્યાપી ગયો છે.
તેઓ કહે છે કે અહીંયા અનેક વખત રજૂઆતો કરવા છતાં તંત્ર આંખ આડા કાન કરી રહ્યું છે. “વર્ષોથી નગરપાલિકા પ્રમુખ અને ધારાસભ્યશ્રી સુધી રજૂઆત છતાં ઉકેલ આવ્યો નથી.
મોટાં નેતાઓ અને અધિકારીઓ અહીં રહે છે છતાં આવી બેદરકારી કેમ? શું સામાન્ય નાગરિકોના જીવનો કોઈ કિંમત નથી?” – રહીશોએ એવો સવાલ ઉઠાવ્યો હતો.
મોટી ખોટ, તંત્રને બોધપાઠ
નર્મદાબેન પ્રજાપતિનું અકાળ અવસાન માત્ર તેમના પરિવાર માટે જ નહીં પરંતુ સમગ્ર રાધનપુર શહેર માટે એક મોટી ખોટ છે.
સામાન્ય નાગરિકને મળતી સુવિધાઓ અને સુરક્ષા પૂરી પાડવામાં નિષ્ફળ રહેલું તંત્ર ફરી એકવાર પ્રશ્નચિહ્ન હેઠળ આવ્યું છે.
આ ઘટનાથી બોધપાઠ લઈ નગરપાલિકા તથા સંબંધિત તંત્ર તરત જ નક્કર પગલાં ભરશે તેવી સમગ્ર શહેરવાસીઓની આશા છે.
આ બનાવે સ્પષ્ટ સંદેશ આપ્યો છે કે તંત્રની બેદરકારી હવે લોકોના જીવ માટે સીધું જોખમ બની રહી છે.
જો તાત્કાલિક સુધારાત્મક પગલાં નહીં લેવાય તો આવી દુર્ઘટનાઓ ફરી બનવાની શક્યતા નકારી શકાય નહીં.
The Gujarat Live News ગોવાભાઈ આહીર પાટણ