રાધનપુરમાં વિકાસના દાવા ખોખલા સાબિત થયા
મીરાદરવાજા થી પટણી દરવાજા રોડ પર ગંદકી, ઉભરાતી ગટરો અને તૂટેલા રસ્તાઓથી નાગરિકો પરેશાન – “હવે વચનો નહીં, કામ જોઈએ”
રાધનપુર શહેરમાં વિકાસના મોટા મોટા દાવાઓ વચ્ચે શહેરની વાસ્તવિક સ્થિતિ ચોંકાવનારી રીતે સામે આવી રહી છે. શહેરના મીરાદરવાજા થી પટણી દરવાજા સુધીના મુખ્ય માર્ગ પર, ખાસ કરીને પ્રકાશ શોપિંગ સેન્ટર આસપાસ ગંદકી, ઉભરાતી ગટરો, કચરાના ઢગલા અને તૂટેલા રસ્તાઓના કારણે નાગરિકોનું જનજીવન ગંભીર રીતે પ્રભાવિત થયું છે.
વિસ્તારમાં રોડ પર ગંદુ પાણી સતત ફરી વળતું રહે છે, જેના કારણે દુર્ગંધ ફેલાઈ રહી છે અને આસપાસનું વાતાવરણ અસહ્ય બની ગયું છે. કાદવ-કીચડના કારણે વાહનચાલકોને ભારે મુશ્કેલીનો સામનો કરવો પડે છે, જ્યારે પાદચારીઓ માટે રસ્તા પરથી પસાર થવું જોખમી બની ગયું છે. રોજિંદા આવન-જાવન કરતા લોકો માટે આ માર્ગ હાલ પરેશાનીનો કેન્દ્ર બની ગયો છે.
સ્થાનિક રહીશો અને વેપારીઓના જણાવ્યા મુજબ આ સમસ્યા કોઈ એક દિવસની નથી, પરંતુ લાંબા સમયથી યથાવત છે. વારંવાર ગટરો ઉભરાવા, ગંદુ પાણી રસ્તા પર ફરી વળવું અને કચરાની સમયસર સફાઈ ન થવી – આ બધી સમસ્યાઓએ લોકોના દૈનિક જીવનને અસરગ્રસ્ત બનાવ્યું છે. સ્થાનિકોએ અનેકવાર નગરપાલિકા અને સંબંધિત તંત્રને મૌખિક તેમજ લેખિત રજૂઆતો કરી હોવા છતાં સમસ્યાનો કાયમી ઉકેલ લાવવામાં આવ્યો નથી.
ખાસ કરીને પ્રકાશ શોપિંગ સેન્ટર આસપાસની સ્થિતિ વધુ ગંભીર બની ગઈ છે. અહીં ગંદકી અને કાદવના કારણે ગ્રાહકો પણ આવવાનું ટાળી રહ્યા છે, જેના કારણે વેપારીઓના ધંધા પર સીધી અસર પડી રહી છે. વેપારીઓનું કહેવું છે કે આવી અસ્વચ્છતા અને દુર્ગંધના કારણે વ્યવસાય ચલાવવો મુશ્કેલ બની ગયો છે.
શહેરના મધ્ય વિસ્તારમાં જ આવી દયનીય સ્થિતિ જોવા મળતા નાગરિકોમાં ભારે રોષ ફેલાયો છે. લોકો ખુલ્લેઆમ કહી રહ્યા છે કે વિકાસ માત્ર ભાષણો અને કાગળો સુધી મર્યાદિત રહી ગયો છે, જ્યારે જમીન પર હકીકત એકદમ વિપરીત છે. ખાસ કરીને સ્થાનિક સ્વરાજ્યની ચૂંટણી નજીક આવતા લોકોમાં આ મુદ્દે ચર્ચા વધુ તેજ બની છે.
સ્થાનિકોમાં એવો પણ આક્ષેપ ઉઠી રહ્યો છે કે પ્રજાની સમસ્યાઓ માત્ર ચૂંટણી સમયે જ યાદ આવે છે, જ્યારે બાકીના સમય દરમિયાન તંત્ર નિષ્ક્રિય રહે છે. શહેરના મુખ્ય માર્ગ પર જ આવી સ્થિતિ હોવાને કારણે લોકો પ્રશ્ન ઉઠાવી રહ્યા છે કે જો અહીં આવી હાલત છે, તો અન્ય વિસ્તારોમાં પરિસ્થિતિ કેટલી ગંભીર હશે?
ઉભરાતી ગટરો અને ગંદકીના કારણે વિસ્તારના લોકોમાં રોગચાળો ફેલાવાની ભીતિ પણ વધી રહી છે. ખાસ કરીને બાળકો, મહિલાઓ અને વૃદ્ધો માટે આ પરિસ્થિતિ વધુ જોખમી બની રહી છે. વરસાદી માહોલ હોય કે સામાન્ય દિવસ – બન્ને પરિસ્થિતિમાં ગંદુ પાણી અને કાદવ-કીચડનો માહોલ યથાવત રહે છે.
નાગરિકો હવે ખુલ્લેઆમ તંત્રને ચીમકીભર્યો સંદેશ આપી રહ્યા છે:
“હવે ફક્ત વચનો અને આશ્વાસનો નહીં… અમને કામ જોઈએ, કાયમી ઉકેલ જોઈએ. નહીં તો જનતા જવાબ આપશે.”
રાધનપુર શહેરમાં વિકાસના દાવાઓ વચ્ચે ઉભી થયેલી આ પરિસ્થિતિ તંત્ર માટે શરમજનક ગણાઈ રહી છે. હવે પ્રશ્ન એ છે કે જવાબદાર તંત્ર સમયસર જાગીને અસરકારક પગલાં લેશે કે ફરી એકવાર માત્ર આશ્વાસનો જ આપવામાં આવશે.
નાગરિકોની નજર હવે તંત્ર પર ટકેલી છે. જો સમયસર યોગ્ય કાર્યવાહી નહીં કરવામાં આવે, તો આ મુદ્દો આવનારા દિવસોમાં વધુ ઉગ્ર સ્વરૂપ ધારણ કરી શકે તેવી શક્યતા નકારી શકાય તેમ નથી.
The Gujarat Live News ગોવાભાઈ આહીર પાટણ